Mahabharata Tatparya Nirnaya Kannada 30-06-10

 

ಪ್ರಷ್ಟಾ ಚ ದಾತಾSಖಿಲರಾಜನಮ್ಯೋ ಯಷ್ಟಾ ಚ ಧರ್ಮ್ಮಾತ್ಮಜ ಏವ ತತ್ರ ।

ಬಭೂವ ಪಾಣ್ಡೋರ್ಗ್ಗೃಹಮಾವಸಂಶ್ಚ ರಾಜಾಧಿರಾಜೋ ವನಿತಾನಿವೃತ್ತಃ ॥ ೩೦.೦೬ ॥

 

ಧರ್ಮರಾಜ ಪಾಂಡುವಿನ ಮನೆಯಲ್ಲಿ ವಾಸಮಾಡುತ್ತಿದ್ದ. ಸ್ತ್ರೀಭೋಗದಿಂದ ನಿವೃತ್ತನಾದ ಅವನು  ಪ್ರಶ್ನೆಮಾಡುವವನಾಗಿಯೂ, ಎಲ್ಲಾ ರಾಜರಿಂದ ನಮಸ್ಕಾರಕ್ಕೆ ಒಳಗಾದವನಾಗಿಯೂ, ಯಾಗ ಮಾಡುವವನಾಗಿಯೂ ಇರುತ್ತಿದ್ದ.  

 

ಭೀಮಸ್ತು ದೌರ್ಯ್ಯೋಧನಮೇವ ಸದ್ಮ ಪ್ರಪೇದಿವಾನೂರ್ಜ್ಜಿತವೀರ್ಯ್ಯಲಬ್ಧಮ್ ।

ಕೃಷ್ಣಾಸಹಾಯಃ ಸುರರಾಜಯೋಗ್ಯಾನಭುಙ್ಕ್ತ ಭೋಗಾನ್ ಯುವರಾಜ ಏವ ॥ ೩೦.೦೭ ॥

 

ಯುವರಾಜನಾದ ಭೀಮಸೇನನು ತನ್ನ ಉತ್ಕೃಷ್ಟವಾದ ಪರಾಕ್ರಮದಿಂದ ಪಡೆದುಕೊಂಡ ದುರ್ಯೋಧನನ ಮನೆಯನ್ನು ಹೊಂದಿದವನಾಗಿ, ಅಲ್ಲಿ ದ್ರೌಪದಿಯಿಂದ ಕೂಡಿಕೊಂಡು ಅಲೌಕಿಕವಾದ (ದೇವೇಂದ್ರ ಮಾತ್ರ ಹೊಂದಬಲ್ಲ) ಭೋಗಗಳನ್ನು ಭೋಗಿಸಿದನು.

 

ಕೃಷ್ಣಾ ಚ ಪಾರ್ತ್ಥಾಂಶ್ಚತುರೋ ವಿಹಾಯ ಸುವ್ಯಕ್ತಸಾರಸ್ವತಶುದ್ಧಭಾವಾ ।

ರರಾಜ ರಾಜಾವರಜೇನ ನಿತ್ಯಮನನ್ಯಯೋಗೇನ ಶಿಖೇವ ವಹ್ನೇಃ ॥ ೩೦.೦೮ ॥

 

ಭಾರತೀದೇವಿಯ ಅಸ್ತಿತ್ವವು ಸಂಪೂರ್ಣವಾಗಿ ಅಭಿವ್ಯಕ್ತಿಹೊಂದಿದ ದ್ರೌಪದಿಯು, ಇತರ ಪಾಂಡವರನ್ನು ಬಿಟ್ಟು, ಅಗ್ನಿಯ ಜ್ವಾಲೆಯಂತೆ, ಬೇರೆಯವರ ಸಂಪರ್ಕವಿಲ್ಲದೇ, ಧರ್ಮರಾಜನ ತಮ್ಮನಾಗಿರುವ ಭೀಮಸೇನನೊಂದಿಗೆ ಶೋಭಿಸಿದಳು.

 

ಪ್ರೀತ್ಯೈವ ವಿಜ್ಞಾನಯುಜಾSನ್ಯಪಾರ್ತ್ಥೈಃ ಸಂವಾದತಃ ಪರಿಹೃತಾ ಗತಭಾವಿಕಾಲೇ ।

ಅಪಿ ಸ್ವಕೀಯಂ ಪತಿಮೇವ ಭೀಮಮವಾಪ್ಯ ಸಾ ಪರ್ಯ್ಯಚರನ್ಮುದೈವ ॥ ೩೦.೦೯ ॥

 

ಪ್ರಜ್ಞೆಯನ್ನು ಹೊಂದಿರುವ ಅವಳಿಂದ ಪ್ರೀತಿಯಿಂದಲೇ, ಉಳಿದ ಪಾಂಡವರೊಡನೆ ಸಂವಾದಮಾಡಿ, ಅವರಿಂದ ದೂರ ಇದ್ದಳು. ಹೀಗೆ ತನ್ನ ಸ್ವಕೀಯ ಪತಿಯಾದ ಭೀಮಸೇನನನ್ನು ಹೊಂದಿ ದ್ರೌಪದಿ ಆನಂದದಿಂದಿದ್ದಳು.  

 

ರರಾಜ ರಾಜಾವರಜಸ್ತಯಾ ಸ ದ್ವಿರೂಪಯಾ ಸೋಮಕಕಾಶಿಜಾತಯಾ ।

ಶ್ರಿಯಾ ಭುವಾ ಚೈವ ಯಥಾSಬ್ಜನಾಭೋ ನಿಹತ್ಯ ಸರ್ವಾನ್ ದಿತಿಜಾನ್ ಮಹಾಬ್ಧೌ ॥ ೩೦.೧೦ ॥

 

ಯಾವ ರೀತಿ ಶ್ರೀಮನ್ನಾರಾಯಣನು ಎಲ್ಲಾ ರಾಕ್ಷಸರನ್ನು ಕೊಂದು, ಕ್ಷೀರಸಾಗರದಲ್ಲಿ ಶ್ರೀದೇವಿ- ಭೂದೇವಿಯರಿಂದ ಕೂಡಿ ಶೋಭಿಸಿರುವನೋ ಹಾಗೆಯೇ, ದ್ರೌಪದಿ ಮತ್ತು ಕಾಳಿ ಎನ್ನುವ ಎರಡು ರೂಪದಲ್ಲಿರುವ ಭಾರತೀದೇವಿಯೊಂದಿಗೆ ಭೀಮಸೇನನು ಶೋಭಿಸಿದನು.