Mahabharata Tatparya Nirnaya Kannada 32-148-153

 

ತಂ ಜಾತಮಾತ್ರಂ ಪ್ರಹಸನ್ತಮೀಕ್ಷ್ಯಸುವಿಸ್ಮಿತೈಃ ಪೃಷ್ಟ ಉವಾಚ ವಿಷ್ಣುಃ ।

ಬುದ್ಧೋSಹಮಿತ್ಯೇವ ಸುನಿತ್ಯಬೋಧಾಜ್ಜಗಾದ ಚೈಷಾಮಥ ಬುದ್ಧದರ್ಶನಮ್ ॥ ೩೨.೧೪೮ ॥

 

ಹುಟ್ಟಿದ ಕೂಡಲೇ ನಗುತ್ತಿರುವ ಆ ಮಗುವನ್ನು ಕಂಡು, ಅಚ್ಚರಿಗೊಂಡ ಅವರಿಂದ ಕೇಳಲ್ಪಟ್ಟವನಾದ ವಿಷ್ಣುವು, ನಿತ್ಯವಾಗಿರುವ ಜ್ಞಾನವಿರುವುದರಿಂದ ನಾನು ‘ಬುದ್ಧ’ ಎಂದೇ ಹೇಳಿಕೊಂಡನು. ಅವರಿಗೆ ಇದು ‘ಬುದ್ಧನ ಶಾಸ್ತ್ರಾ’ ಎಂದೂ ಹೇಳಿದನು.

 

ತಥಾSಪ್ಯವಿಶ್ವಾಸಮವೇಕ್ಷ್ಯ ತೇಷಾಂ ಸಸ್ಮಾರ ದೇವಾನಖಿಲಾನ್ ಜನಾರ್ದ್ದನಃ ।

ವಿಜ್ಞಾಯ ತೇ ತಸ್ಯ ಮನೋಗತಂ ನಿಜಾನ್  ಪ್ರಚಿಕ್ಷಿಪುರ್ಹೇತಿಗಣಾನಮುಷ್ಮಿನ್ ॥ ೩೨.೧೪೯ ॥

 

ಹೀಗೆ ಸ್ವಯಂ ದೇವರೇ ‘ನಾನು ಬುದ್ಧ, ಈ ಎಲ್ಲಾ ವೈದಿಕ ಕರ್ಮಗಳನ್ನು ಮಾಡಬೇಡಿ’ ಎಂದು ಹೇಳಿದಾಗ, ಅವರಿಗೆ ವಿಶ್ವಾಸವೇ ಬರಲಿಲ್ಲ. ಅವರ ಅವಿಶ್ವಾಸವನ್ನು ಕಂಡು, ಶ್ರೀಹರಿಯು ಎಲ್ಲಾ ದೇವತೆಗಳನ್ನು ಸ್ಮರಿಸಿದನು. ಆಗ ಎಲ್ಲಾ ದೇವತೆಗಳು ನಾರಾಯಣನ ಮನಸ್ಸಿನ ಅಭಿಪ್ರಾಯವನ್ನು ತಿಳಿದು, ಈ ಬುದ್ಧನ ಮೇಲೆ ತಮ್ಮ ಆಯುಧಗಳನ್ನು ಎಸೆದರು.

 

ಸ ಜಾತಮಾತ್ರಃ ಶಿವಪೂರ್ವಕಾಣಾಂ ಶೂಲಾದಿಹೇತೀರಖಿಲಾ ನಿಗೀರ್ಯ್ಯ ।

ದೈತ್ಯಾತಿಮೋಹಾಯ ನಿಜಂ ಚ ಚಕ್ರಂ ಸ್ವಮುಕ್ತಮಾಶ್ವೇವ ವಶೀ ಸಮಗ್ರಹೀತ್ ॥ ೩೨.೧೫೦ ॥

 

ಈಗಷ್ಟೇ ಹುಟ್ಟಿರುವ ಮಗುವಿನ(ಬುದ್ಧನ) ರೂಪದಲ್ಲಿರುವ ಆ ನಾರಾಯಣನು, ಶಿವ ಮೊದಲಾದ ಎಲ್ಲಾ ದೇವತೆಗಳ, ಶೂಲ ಮೊದಲಾದ ಆಯುಧಗಳನ್ನು ನುಂಗಿ, ದೈತ್ಯರನ್ನು ಮೋಹಗೊಳಿಸಲು, ವಿಷ್ಣುರೂಪದಲ್ಲಿ ತಾನೇ  ಬಿಟ್ಟ ತನ್ನ ಸುದರ್ಶನ ಚಕ್ರವನ್ನು ಶೀಘ್ರದಲ್ಲಿ ಹಿಡಿದುಕೊಂಡ.

 

ತದಾಸನತ್ವೇನ ವಿಧಾಯ ತಸ್ಮಿನ್ ಸಮಾಸ್ಥಿತಂ ದೇವಗಣಾಃ ಪ್ರಣಮ್ಯ ।

ಜಗ್ಮುಃ ಸ್ವಧಾಮಾನಿ ವಚಾಂಸಿ ಚಾಸ್ಯ ಸ್ವೀಚಕ್ರುರಾಶ್ವೇವ ಜಿನಾದಿದೈತ್ಯಾಃ ॥ ೩೨.೧೫೧ ॥

 

ಸುದರ್ಶನ ಚಕ್ರವನ್ನೇ ತನ್ನ ಆಸನವಾಗಿ ಮಾಡಿಕೊಂಡಿರುವ ಆ ಮಗುವಿನ ರೂಪದಲ್ಲಿರುವ ಶ್ರೀಹರಿಗೆ ದೇವತೆಗಳೆಲ್ಲರೂ ನಮಸ್ಕರಿಸಿ, ತಮ್ಮ ಧಾಮಕ್ಕೆ ತೆರಳಿದರು. ಆ ಬುದ್ಧನ ಮಾತುಗಳನ್ನು ಜಿನ ಮೊದಲಾದ ದೈತ್ಯರು ಕೂಡಲೇ ಸ್ವೀಕರಿಸಿದರು.

 

ತೇ ಜ್ಞಾನಧರ್ಮ್ಮಾವಪಹಾಯ ಪಾಪಾ ವಿಮೋಹಿತಾ ದೇವವರೇಣ ಸರ್ವೇ ।

ಜಗ್ಮುಸ್ತಮೋSನ್ಧಂ ಕ್ಷಣಿಕಂ ಸಮಸ್ತಂ ಜ್ಞಾನಂ ನಸಚ್ಛೇತಿ ದೃಢಂ ಸ್ಮರನ್ತಃ ॥ ೩೨.೧೫೨ ॥

 

ಪಾಪಿಷ್ಠರಾದ ಆ ಎಲ್ಲಾ ದೈತ್ಯರು ನಾರಾಯಣನಿಂದ ದಾರಿ ತಪ್ಪಿಸಲ್ಪಟ್ಟವರಾಗಿ, ಜ್ಞಾನ ಹಾಗೂ ಧರ್ಮವನ್ನು ಬಿಟ್ಟು, ಈ ಪ್ರಪಂಚ ಕ್ಷಣಿಕವೆಂದೂ, ಈ ಪ್ರಪಂಚದಲ್ಲಿ ಕೇವಲ  ಜ್ಞಾನ ಮಾತ್ರ ಇರುವುದು  ಎಂದೂ, ಈ ಪ್ರಪಂಚ ಅಸತ್ಯ, ಶೂನ್ಯ, ಎಂದೂ ಗಟ್ಟಿಯಾಗಿ ಸ್ಮರಣೆ ಮಾಡುತ್ತಾ, ಅನ್ಧಂತಮಸ್ಸನ್ನು ಹೊಂದಿದರು.

 

ನಾರಾಯಣೋSಪ್ಯಾಪ್ಯ ಸುರೇನ್ದ್ರವೃನ್ದಂ ವೃತ್ತಂ ಚ ತೇಷಾಮಖಿಲಂ ನಿಗದ್ಯ ।

ಪೃಷ್ಟಶ್ಚ ತೈರಾಹ ನಿಜಂ ಹೃದಿಸ್ಥಂ ಬೌದ್ಧಾಗಮಾರ್ತ್ಥಂ ಸೃತಿಬನ್ಧಮೋಚನಮ್ ॥ ೩೨.೧೫೩ ॥

 

ಬುದ್ಧರೂಪಿಯಾದ ನಾರಾಯಣನೂ ಕೂಡಾ ದೇವತಾ ಸಮೂಹವನ್ನು ಹೊಂದಿ, ಆ ದೇವತೆಗಳಿಗೆ ಎಲ್ಲಾ ವೃತ್ತಾಂತವನ್ನು ಹೇಳಿ, ಅವರಿಂದ ಬುದ್ಧಶಾಸ್ತ್ರದ ಕುರಿತು ಕೇಳಲ್ಪಟ್ಟವನಾಗಿ, ತನ್ನ ಹೃದಯದಲ್ಲಿ ಇರುವ, ತಾನೇ ರಚನೆ ಮಾಡಿದ, ಸಂಸಾರದ ಬಂಧನವನ್ನು ಬಿಡುಗಡೆ ಮಾಡುವ ಬೌದ್ಧಾಗಮನದ ನಿಜಾರ್ಥವನ್ನು  ಅವರಿಗೆ ಬಿಡಿಸಿ ಹೇಳಿದನು.