Mahabharata Tatparya Nirnaya Kannada 10.69-10.73

ಅಥಾಸ್ಯ ಪುತ್ರತ್ವಮವಾಪ್ತುಮಿಚ್ಛಂಶ್ಚಚಾರ ರುದ್ರಃ ಸುತಪಸ್ತದೀಯಮ್ ।

ದದೌ ಚ ತಸ್ಮೈ ಭಗವಾನ್ ವರಂ ತಂ ಸ್ವಯಂ ಚ ತಪ್ತ್ವೇವ ತಪೋ ವಿಮೋಹಯನ್           ॥೧೦.೬೯॥

ತದನಂತರ, ವೇದವ್ಯಾಸರ ಮಗನಾಗಿ ಹುಟ್ಟಬೇಕು ಎನ್ನುವ ಇಚ್ಛೆಯಿಂದ, ರುದ್ರದೇವರು ವೇದವ್ಯಾಸರ ಕುರಿತಾಗಿ ಉತ್ಕೃಷ್ಟವಾದ  ತಪಸ್ಸನ್ನು ಮಾಡಿದರು. ಈ ರೀತಿ ತಪಸ್ಸನ್ನು ಮಾಡಿದ ರುದ್ರದೇವರಿಗೆ ತನ್ನ ಮಗನಾಗಿ ಅವತರಿಸುವಂತೆ ವೇದವ್ಯಾಸರು ವರವನ್ನು ಅನುಗ್ರಹಿಸಿದರು.  ಆದರೆ,  ದುಷ್ಟ ಜನರ ಮೋಹನಾರ್ಥನವಾಗಿ ತಾನೇ ತಪಸ್ಸು ಮಾಡಿ ರುದ್ರನನ್ನು ಮಗನಾಗಿ ಪಡೆದಂತೆ ತೋರಿದರು.

[ಮೊದಲು ರುದ್ರ ದೇವರು ತಪಸ್ಸನ್ನು ಮಾಡಿ ಭಗವಂತನ ಮಗನಾಗಿ ಹುಟ್ಟುವ ವರವನ್ನು ಪಡೆದರು. ಆದರೆ, ಆ ನಂತರ, ದುರ್ಜನರ ಕಣ್ಣಿಗೆ ಕಾಣುವಂತೆ, ರುದ್ರ ಮಗನಾಗಿ ಬರಲಿ ಎಂದು ವೇದವ್ಯಾಸರು ತಪಸ್ಸು ಮಾಡಿದರು! ವೇದವ್ಯಾಸರು ರುದ್ರನನ್ನು ಮಗನಾಗಿ ಪಡೆಯಲು ತಪಸ್ಸು ಮಾಡಿರುವ ಪ್ರಸಂಗವನ್ನು ಪುರಾಣಗಳು ಉಲ್ಲೇಖಿಸಿಸುತ್ತವೆ].

ವಿಮೋಹನಾಯಾಸುರಸರ್ಗ್ಗಿಣಾಂ ಪ್ರಭುಃ ಸ್ವಯಂ ಕರೋತೀವ ತಪಃ ಪ್ರದರ್ಶಯೇತ್ ।

ಕಾಮಾದಿದೋಷಾಂಶ್ಚ ಮೃಷೈವ ದರ್ಶಯೇನ್ನ ತಾವತಾ ತೇsಸ್ಯ ಹಿ ಸನ್ತಿ ಕುತ್ರಚಿತ್         ॥೧೦.೭೦ ॥

ಸರ್ವಸಮರ್ಥರಾದ ವೇದವ್ಯಾಸರೂಪಿ ಭಗವಂತ, ಅಸುರ ಸ್ವಭಾವದವರ ಮೋಹಕ್ಕಾಗಿ, ತಾನೇ ತಪಸ್ಸನ್ನು ಮಾಡುತ್ತಾನೋ ಎಂಬಂತೆ ತೋರಿಸುತ್ತಾನಷ್ಟೇ. ಹಾಗೆಯೇ, ಅವನು ಕಾಮಾದಿ ದೋಷಗಳನ್ನು ತೋರಿಸುತ್ತಾನೆ. ಆದರೆ ಕಾಮಾದಿಗಳು ನಾರಾಯಣನಿಗೆ ಯಾವುದೇ ರೂಪದಲ್ಲೂ ಇರುವುದಿಲ್ಲಾ.

ತತಸ್ತ್ವರಣ್ಯ ಸ್ಮ ಬಭೂವ ಪುತ್ರಕಃ ಶಿವೋsಸ್ಯ ಸೋsಭೂಚ್ಛುಕನಾಮಧೇಯಃ ।

ಶುಕೀ ಹಿ ಭೂತ್ವಾsಭ್ಯಗಮದ್ ಘೃತಾಚೀ ವ್ಯಾಸಂ ವಿಮತ್ಥ್ನನ್ತಮುತಾರಣೀ ತಮ್          ॥೧೦.೭೧॥

ಅಕಾಮಯನ್ ಕಾಮುಕವತ್ ಸ ಭೂತ್ವಾ ತಯಾsರ್ತ್ಥಿತಸ್ತಂ ಶುಕನಾಮಧೇಯಮ್ ।

ಚಕ್ರೇ ಹ್ಯರಣ್ಯೋಸ್ತನಯಂ ಚ ಸೃಷ್ಟ್ವಾ ವಿಮೋಹಯಂಸ್ತತ್ವಮಾರ್ಗ್ಗೇಷ್ವಯೋಗ್ಯಾನ್     ॥೧೦.೭೨॥

ತದನಂತರ, ಸದಾಶಿವನು ಈ ವೇದವ್ಯಾಸರ ಪುತ್ರನಾಗಿ(ಶುಕನಾಗಿ) ಅರಣಿಯಿಂದ ಹುಟ್ಟಿದನು. (ಅರಣಿಮಥನ ಕಾಷ್ಠದ ಮದ್ಯದಲ್ಲಿ  ಹುಟ್ಟಿದನು).

ಶುಕಮುನಿಯ ಹುಟ್ಟು ಅರಣಿಯಲ್ಲಿ ಹೇಗೆ ಸಾಧ್ಯವಾಯಿತು ಎಂದರೆ:  ಘೃತಾಚೀ ಎನ್ನುವ ಅಪ್ಸರೆಯು ಹೆಣ್ಣುಗಿಣಿ ರೂಪದಲ್ಲಿ(ಶುಕಿಯಾಗಿ) ಅರಣಿಯನ್ನು ಕಡೆಯುತ್ತಿರುವ ವೇದವ್ಯಾಸರನ್ನು ಕುರಿತು ಬಂದಳು.

ವಸ್ತುತಃ ಕಾಮದ ಸ್ಪರ್ಶವೂ ಇಲ್ಲದೇ ಇರುವ ವ್ಯಾಸರು, ಅವಳಿಂದ ಬೇಡಲ್ಪಟ್ಟವನಾಗಿ, ಕಾಮುಕನಂತೆ ತೋರಿಸುತ್ತಾ,  ಶುಕ ಎನ್ನುವ ಹೆಸರಿನ ಆ ಮಗುವನ್ನು ಹುಟ್ಟಿಸಿದರು.

[ಶುಕಿಯನ್ನು  ನೋಡಿ ವೇದವ್ಯಾಸರ ರೇತಸ್ಸು ಅರಣಿಯಲ್ಲಿ ಬಿತ್ತು. ಅದು ಕೂಡಲೇ ಒಂದು ಮಗುವಾಗಿ ಹೊರಬಂತು. ಇಲ್ಲಿಯೂ ಕೂಡಾ, ಘೃತಾಚೀ ಕೇವಲ ನಿಮಿತ್ತಮಾತ್ರ . ಇದೆಲ್ಲವೂ  ಅಯೋಗ್ಯರನ್ನು ತತ್ತ್ವಮಾರ್ಗದಲ್ಲಿ ಮೋಹಗೊಳಿಸಲು ದೇವರು ಆಡುವ ಲೀಲಾನಾಟಕ. ಬಾಹ್ಯವಾಗಿ ದುರ್ಜನರ ದೃಷ್ಟಿಯಲ್ಲಿ: ಶುಕಿಯನ್ನು ಕಂಡ ಅರಣಿಮಥನ  ಮಾಡುತ್ತಿದ್ದ  ವೇದವ್ಯಾಸರು  ಕಾಮವಶರಾದರು, ಅದರ ಫಲದಿಂದ ಶುಕನ ಜನನವಾಯಿತು! )

ಶುಕಂ ತಮಾಶು ಪ್ರವಿವೇಶ ವಾಯುರ್ವ್ಯಾಸಸ್ಯ ಸೇವಾರ್ತ್ಥಮಥಾಸ್ಯ ಸರ್ವಮ್ ।

ಜ್ಞಾನಂ ದದೌ ಭಗವಾನ್ ಸರ್ವವೇದಾನ್ ಸಭಾರತಂ ಭಾಗವತಂ ಪುರಾಣಾಮ್         ॥೧೦.೭೩॥

ಶುಕಮುನಿಯ ಜನನ ನಂತರ,  ವೇದವ್ಯಾಸರ ಸೇವೆಗಾಗಿ ಮುಖ್ಯಪ್ರಾಣನು ಶುಕಾಚಾರ್ಯರ ಒಳಗೆ ಪ್ರವೇಶ ಮಾಡಿದರು. ವೇದವ್ಯಾಸರು ಶುಕನಿಗೆ ವೇದ, ಮಹಾಭಾರತ, ಭಾಗವತವೇ ಮೊದಲಾದ  ಪುರಾಣವನ್ನೊಳಗೊಂಡ ಸಮಸ್ತ ಜ್ಞಾನವನ್ನು ಉಪದೇಶ ಮಾಡಿದರು.