Mahabharata Tatparya Nirnaya Kannada 21: 383-388

 

ಇತೀರಿತೋ ವಿನಿರ್ಭತ್ಸ್ಯ ಪುತ್ರಂ ದುಃಶಾಸನಂ ನೃಪಃ ।

ಅಮೋಚಯದ್ ವರೈಶ್ಚೈನಾಂ ಛನ್ದಯಾಮಾಸ ಪಾರ್ಷತೀಮ್             ॥೨೧.೩೮೩॥

 

ಈರೀತಿಯಾಗಿ ಹೇಳಲ್ಪಟ್ಟ ಧೃತರಾಷ್ಟ್ರನು ತನ್ನ ಮಗನಾದ ದುಶ್ಯಾಸನನ್ನು ಚೆನ್ನಾಗಿ ಬೈದು, ದ್ರೌಪದಿಯನ್ನು ಬಿಡುಗಡೆ ಮಾಡಿದ ಮತ್ತು  ಅವಳಲ್ಲಿ ‘ನೀನು ಯಾವ ವರವನ್ನಾದರೂ ಕೇಳು’ ಎಂದು ಹೇಳಿದ.

 

ಛನ್ದಿತಾ ಸಾ ವರೈಸ್ತೇನ ಧರ್ಮ್ಮೇ ಭಾಗವತೇ ಸ್ಥಿತಾ ।

ನೈವಾSತ್ಮನೋ ವರಾನ್ ವವ್ರೇ ವವ್ರೇ ತೇಷಾಂ ವಿಮೋಕ್ಷಣಮ್             ॥೨೧.೩೮೪॥

 

ಅವಳು ವರ ಕೇಳುವಂತೆ ಹೇಳಲ್ಪಟ್ಟರೂ ಕೂಡಾ, ಭಾಗವತ ಧರ್ಮದಲ್ಲಿ ಇರುವವಳಾಗಿ ತನಗಾಗಿ ವರಗಳನ್ನು ಕೇಳಲಿಲ್ಲ. ತನ್ನ ಗಂಡಂದಿರ ವಿಮೋಕ್ಷವನ್ನಷ್ಟೇ ಕೇಳಿದಳು.

 

ಯುಧಿಷ್ಠಿರಸ್ಯ ಸಭ್ರಾತುಃ ಸರಾಷ್ಟ್ರಸ್ಯ ವಿಮೋಕ್ಷಣಮ್ ।

ದದೌ ನೃಪೋSಸ್ಯಾ ನ ಪುನಶ್ಚನ್ದ್ಯಮಾನಾSಪಿ ಸಾsವೃಣೋತ್                         ॥೨೧.೩೮೫॥

 

ಅಣ್ಣತಮ್ಮಂದಿರರಿಂದ ಕೂಡಿದ, ಇಡೀ ದೇಶದಿಂದ ಕೂಡಿದ ಯುಧಿಷ್ಠಿರನ ಬಿಡುಗಡೆಯನ್ನು ಧೃತರಾಷ್ಟ್ರ ಅವಳಿಗಾಗಿ ಕೊಟ್ಟ. ಮತ್ತೆ ಪುನಃ ವರವನ್ನು ಕೇಳೆಂದು ಒತ್ತಾಯಿಸಿದರೂ ಕೂಡಾ ಅವಳು ಕೇಳಲಿಲ್ಲ.

 

[ದ್ರೌಪದಿ ಭಾಗವತ ಧರ್ಮದಲ್ಲಿ ಇದ್ದುದರಿಂದ ವರವನ್ನು ಕೇಳಲಿಲ್ಲ. ಈ ಭಾಗವತ ಧರ್ಮದ ಕುರಿತು ಹೇಳುತ್ತಾರೆ:]

 

ಭರ್ತ್ತುರ್ವಿಷ್ಣೋಶ್ಚ ನಾನ್ಯಸ್ಮಾದ್ ವರಸ್ವೀಕಾರ ಇಷ್ಯತೇ ।

ಏವಂ ಹಿ ಭಗವದ್ಧರ್ಮ್ಮಸ್ತಸ್ಮಾತ್ ಸಾ ನಾವೃಣೋತ್ ಪರಮ್             ॥೨೧.೩೮೬॥

 

ಹೆಣ್ಣಿಗೆ ಗಂಡನಿಂದ ಅಥವಾ ನಾರಾಯಣನಿಂದ ಹೊರತಾಗಿ ಬೇರೆಯವರಿಂದ ವರವನ್ನು ಪಡೆಯುವುದು ಭಗವದ್ಧರ್ಮ ಅಲ್ಲ. ಆ ಕಾರಣದಿಂದ ಅವಳು ಬೇರೆ ವರವನ್ನು ಕೇಳಲಿಲ್ಲ.

 

[ಹಾಗಿದ್ದರೆ ಗಂಡಂದಿರ ವಿಮೋಕ್ಷವನ್ನೂ, ರಾಜ್ಯವನ್ನೂ ಪಡೆದಳಲ್ಲ, ಅದು ಭಾಗವತ ಧರ್ಮಕ್ಕೆ ಒಪ್ಪುತ್ತದೆಯೇ ಎಂದರೆ:]

 

ಅಧರ್ಮ್ಮತೋ ಹೃತತ್ವಾತ್ತು ತದ್ ದಾನಂ ನ ವರೋ ಭವೇತ್ ।

ಇತಿ ಮತ್ವಾ ಪಾಣ್ಡವಾನಾಂ ವವ್ರೇ ಕೃಷ್ಣಾ ವಿಮೋಕ್ಷಣಮ್                     ॥೨೧.೩೮೭॥

 

ಅದು ಅಧರ್ಮದಿಂದ ಕಸಿದದ್ದಾಗಿದ್ದುದರಿಂದ, ಅವುಗಳನ್ನು ಹಿಂತಿರುಗಿಸುವುದು ವರ ಎನಿಸುವುದಿಲ್ಲ. ಈರೀತಿಯಾಗಿ ಚಿಂತಿಸಿಯೇ ಪಾಂಡವರ ಬಿಡುಗಡೆಯನ್ನು ದ್ರೌಪದಿ ಕೇಳಿದ್ದಳು.

 

[ಪ್ರಕಾರಾಂತರವಾಗಿಯೂ ಕೂಡಾ ಭಾಗವತ ಧರ್ಮಕ್ಕೆ ಹಾನಿಯಾಗಿಲ್ಲ ಏಕೆಂದರೆ: ]

 

ಶ್ವಶುರಾದೈಹಿಕವರಾಃ ಕ್ಷತ್ರಿಯಾಯಾಸ್ತ್ರಯೋ ಯತಃ ।

ಉಕ್ತಾಃ ಶತಂ ಚ ವಿಪ್ರಾಯಾ ಧರ್ಮ್ಮೇ ಭಾಗವತೇ ತತಃ ।

ಹೇತುನಾSನೇನ ವವ್ರೇ ಸಾ ನಾನ್ಯತ್ ಕಿಞ್ಚಿದತಃ ಪರಮ್                    ॥೨೧.೩೮೮॥

 

ಕ್ಷತ್ರಿಯ ಸ್ತ್ರೀಯರಿಗೆ ಮಾವನಿಂದ ಈಲೋಕಕ್ಕೆ ಸಂಬಂಧಿಸಿದ (ಐಹಿಕ) ಮೂರು ವರಗಳಿಗೆ ಅವಕಾಶವಿದ್ದರೆ, ಬ್ರಾಹ್ಮಣ ಸ್ತ್ರೀಗೆ ನೂರು ಐಹಿಕ ವರಗಳು ಗ್ರಾಹ್ಯ ಎಂದು ಭಾಗವತ ಧರ್ಮದಲ್ಲಿ ಹೇಳಲ್ಪಟ್ಟಿದೆ. ಈ ಕಾರಣದಿಂದಲೂ  ಅವಳು ವರವನ್ನು ಪಡೆದಳೇ ವಿನಃ ಬೇರೆ ಯಾವ ಅಭೀಷ್ಟವನ್ನೂ ಅವಳು ಬೇಡಲಿಲ್ಲ.