Mahabharata Tatparya Nirnaya Kannada 9.63-9.68

ಅಥಾsಹ ವಾಯುನನ್ದನಂ ಸ ರಾಘವಃ ಸಮಾಶ್ಲಿಷನ್ ।

ತವಾಹಮಕ್ಷಗೋಚರಃ ಸದಾ ಭವಾಮಿ ನಾನ್ಯಥಾ ॥೯.೬೩॥

ಹೀಗೆ ರಾಮಚಂದ್ರನು ಸ್ವಧಾಮಕ್ಕೆ ತೆರಳಬೇಕು ಎಂದು ತೀರ್ಮಾನಮಾಡಿ, ಭೇರಿ ಘೋಷಣೆಯನ್ನು ಮಾಡಿದ ನಂತರ, ಅದಕ್ಕನುಗುಣವಾಗಿ ಎಲ್ಲರೂ ಬಂದು ಸೇರಿದ ಮೇಲೆ, ಹನುಮಂತನನ್ನು ಆಲಂಗಿಸುತ್ತಾ ಹೇಳುತ್ತಾನೆ: “ನಾನು ಸದಾ  ನಿನ್ನ ಕಣ್ಣಿಗೆ ಕಾಣುತ್ತಿರುತ್ತೇನೆ” ಎಂದು.

ತ್ವಯಾ ಸದಾ ಮಹತ್ ತಪಃ ಸುಕಾರ್ಯ್ಯಮುತ್ತಮೋತ್ತಮಮ್ ।

ತದೇವ ಮೇ ಮಹತ್ ಪ್ರಿಯಂ ಚಿರಂ ತಪಸ್ತ್ವಯಾ ಕೃತಮ್ ॥೯.೬೪ ॥

‘ನಿನ್ನಿಂದ ಹೀಗೆಯೇ ಮಹಾತಪಸ್ಸು ಮಾಡಲ್ಪಡಬೇಕು. ಆ ತಪಸ್ಸು ಜೀವಗಣದಲ್ಲಿ ಯಾರಿಗೂ ಮಾಡಲು ಸಾಧ್ಯವಿಲ್ಲ. ಅದೇ ನನಗೆ ಅತ್ಯಂತ ಪ್ರಿಯವಾದುದು. ಅದನ್ನು ನಿರಂತರವಾಗಿ ನೀನು ಮಾಡುತ್ತಿದ್ದೀಯ. ಮುಂದೆಯೂ ಕೂಡಾ ಮಾಡುತ್ತೀ.

ದಶಾಸ್ಯಕುಮ್ಭಕರ್ಣ್ಣಕೌ ಯಥಾ ಸುಶಕ್ತಿಮಾನಪಿ।

ಜಘನ್ಥ ನ ಪ್ರಿಯಾಯ ಮೇ ತಥೈವ ಜೀವ ಕಲ್ಪಕಮ್ ॥೯.೬೫॥

ಶಕ್ತನಾದರೂ ಕೂಡಾ, ರಾವಣ–ಕುಂಭಕರ್ಣರನ್ನು ನನ್ನ ಪ್ರೀತಿಗಾಗಿ ನೀನು ಕೊಲ್ಲಲಿಲ್ಲಾ. ಆದುದರಿಂದ ನನ್ನ ಪ್ರೀತಿಗಾಗಿ  ನೀನು ಕಲ್ಪಾಂತ್ಯದ ತನಕ ಜೀವಿಸು.

ಪಯೋಬ್ಧಿಮಧ್ಯಗಂ ಚ ಮೇ ಸುಸದ್ಮ ಚಾನ್ಯದೇವ ವಾ ।

ಯಥೇಷ್ಟತೋ ಗಮಿಷ್ಯಸಿ ಸ್ವದೇಹಸಂಯುತೋsಪಿ ಸನ್ ॥೯.೬೬॥

ಕ್ಷೀರ ಸಮುದ್ರದ ಮಧ್ಯದಲ್ಲಿರುವ ನನ್ನ ಮನೆಯನ್ನು, ಹಾಗೇ ಇತರ ಮನೆಯನ್ನು (ಅನಂತಾಸನ, ವೈಕುಂಠ, ಇತ್ಯಾದಿ), ನಿನಗೆ ಬಯಕೆ ಬಂದಾಗ ನಿನ್ನ ಈ ದೇಹವನ್ನು ಧರಿಸಿಯೂ ನೀನು ಪ್ರವೇಶ ಮಾಡಬಲ್ಲೆ. 

ಯಥೇಷ್ಟಭೋಗಸಂಯುತಃ ಸುರೇಶಗಾಯಕಾದಿಭಿಃ ।

ಸಮೀಢ್ಯಮಾನಸದ್ಯಶಾ ರಮಸ್ವ ಮತ್ಪುರಃ ಸದಾ ॥೯.೬೭ ॥

ತವೇಪ್ಸಿತಂ ನ ಕಿಞ್ಚನ ಕ್ವಚಿತ್ ಕುತಶ್ಚಿದೇವ ವಾ ।

ಮೃಷಾ ಭವೇತ್ ಪ್ರಿಯಶ್ಚ ಮೇ ಪುನಃಪುನರ್ಭವಿಷ್ಯಸಿ ॥೯.೬೮ ॥

ನಿನಗೆ ಬಯಸಿದ್ದನ್ನು ನೀನು ಪಡೆಯಬಹುದು. ಗಂಧರ್ವರೆಲ್ಲಾ ನಿನ್ನ ಯಶಸ್ಸನ್ನು  ಗಾನ ಮಾಡುತ್ತಿರುತ್ತಾರೆ. ಅಂಥಹ ಯಶಸ್ಸುಳ್ಳವನಾದ ನೀನು, ನನ್ನ ಎದುರು  ಯಾವಾಗಲೂ ಸಂತಸದಿಂದ ಕ್ರೀಡಿಸುತ್ತಿರು.

ನೀನು ಬಯಸಿದ್ದು ಯಾರಿಂದಲೂ ವ್ಯರ್ಥವಾಗುವುದಿಲ್ಲಾ ಮತ್ತು ನೀನು ಸದಾ ನನಗೆ ಪ್ರಿಯನಾಗಿರುತ್ತೀಯ’.

ಕನ್ನಡ ಪದ್ಯರೂಪ:  https://go-kula.blogspot.com/2018/08/9-63-68.html