Mahabharata Tatparya Nirnaya Kannada 8.35-8.42

ಸುಪ್ತಘ್ನೋ ಯಜ್ಞಕೋಪಶ್ಚ ಶಕುನಿರ್ದ್ದೆವತಾಪನಃ ।

ವಿದ್ಯುಜ್ಜಿಹ್ವಃ̐   ಪ್ರಮಾಥೀ ಚ ಶುಕಸಾರಣಸಂಯುತಾಃ ॥೮.೩೫॥

ರಾವಣಪ್ರೇರಿತಾಃ ಸರ್ವಾನ್ ಮಥನ್ತಃ ಕಪಿಕುಞ್ಜರಾನ್ ।

ಅವದ್ಧ್ಯಾ  ಬ್ರಹ್ಮವರತೋ ನಿಹತಾ ರಾಮಸಾಯಕೈಃ ॥೮.೩೬॥

ಬ್ರಹ್ಮವರದಿಂದ ಅವದ್ಯರಾದ ಸುಪ್ತಘ್ನ, ಯಜ್ಞಕೋಪ, ಶಕುನಿ, ದೇವತಾಪನಃ, ವಿದ್ಯುಜ್ಜಿಹ್ವ̐, ಪ್ರಮಾಥೀ, ಶುಕ, ಸಾರಣ ಎಂಬ ಎಂಟು ಜನ ರಾಕ್ಷಸರು, ರಾವಣನಿಂದ ಪ್ರೇರಿತರಾಗಿ, ಕಪಿಗಳನ್ನು ನಾಶಮಾಡುತ್ತಿರಲು, ರಾಮನ ಬಾಣಗಳಿಂದ ಸತ್ತರು.

ಯುದ್ಧೋನ್ಮತ್ತಶ್ಚ ಮತ್ತಶ್ಚ ದೇವಾನ್ತಕನರಾನ್ತಕೌ ।

ತ್ರಿಶಿರಾ ಅತಿಕಾಯಶ್ಚ ನಿರ್ಯ್ಯಯೂ ರಾವಣಾಜ್ಞಯಾ ॥೮.೩೭॥

ಯುದ್ಧೋನ್ಮತ್ತ, ಮತ್ತ, ದೇವಾನ್ತಕ, ನರಾನ್ತಕ, ತ್ರಿಶಿರಾ, ಅತಿಕಾಯ ಎನ್ನುವ ಆರು ಜನ ಮತ್ತೆ ರಾವಣನ ಆಜ್ಞೆಯಂತೆ ಯುದ್ಧಕ್ಕೆಂದು ಬಂದರು.

ನರಾನ್ತಕೋ ರಾವಣಜೋ ಹಯವರ್ಯ್ಯೋಪರಿ ಸ್ಥಿತಃ ।

ಅಭೀಃ ಸಸಾರ ಸಮರೇ ಪ್ರಾಸೋದ್ಯತಕರೋ ಹರೀನ್ ॥೮.೩೮॥

ರಾವಣನ ಮಗ ನರಾಂತಕ ಉತ್ಕೃಷ್ಟವಾದ ಕುದುರೆಯ ಮೇಲೆ ಕುಳಿತಿದ್ದ. ಯಾವುದೇ ಭಯವಿಲ್ಲದೇ, ಪ್ರಾಸಾಯುಧವನ್ನು ಹಿಡಿದುಕೊಂಡು ಕಪಿಗಳನ್ನು ಯುದ್ಧದಲ್ಲಿ ಎದುರುಗೊಂಡ.

ತಂ ದಹನ್ತಮನೀಕಾನಿ ಯುವರಾಜೋsಙ್ಗದೋ ಬಲೀ ।

ಉತ್ಪಪಾತ ನಿರೀಕ್ಷ್ಯಾsಶು ಸಮದರ್ಶಯದಪ್ಯುರಃ ॥೮.೩೯॥

ಸೈನ್ಯವನ್ನೆಲ್ಲಾ ನಾಶಮಾಡುವ ಅವನನ್ನು ಯುವರಾಜನಾಗಿರುವ, ಬಲಿಷ್ಠನಾದ ಅಂಗದನು ನೋಡಿ, ಅವನೆದುರು ನೆಗೆದು ಎದೆಯನ್ನು ತೋರಿದ.

ತಸ್ಯೋರಸಿ ಪ್ರಾಸವರಂ ಪ್ರಜಹಾರ ಸ ರಾಕ್ಷಸಃ ।

ದ್ವಿಧಾ ಸಮಭವತ್ ತತ್ತು  ವಾಲಿಪುತ್ರಸ್ಯ ತೇಜಸಾ ॥೮.೪೦॥

ಆಗ ನರಾಂತಕನು ಅವನ ಎದೆಗೆ ತನ್ನ ಪ್ರಾಸದಿಂದ ಹೊಡೆದ. ಅದಾದರೋ ಅಂಗದನ ಶಕ್ತಿಯಿಂದ ಎರಡಾಗಿ ಸೀಳಿ ಹೋಯಿತು.

ಅಥಾಸ್ಯ ಹಯಮಾಶ್ವೇವ ನಿಜಘಾನ ಮುಖೇ ಕಪಿಃ ।

ಪೇತತುಶ್ಚಾಕ್ಷಿಣೀ ತಸ್ಯ ಸ ಪಪಾತ ಮಮಾರ ಚ ॥೮.೪೧॥

ನರಾಂತಕ ಪ್ರಾಸದಿಂದ ಹೊಡೆದಾಗ ಅಂಗದನು ನರಾಂತಕನ ಕುದುರೆಯ ಮುಖಕ್ಕೆ ಹೊಡೆದ. ಆಗ ಆ ಕುದುರೆಯ ಕಣ್ಣುಗಳೆರಡು  ಕೆಳಗೆ ಬಿದ್ದವು ಮತ್ತು  ಕುದುರೆ ಸಾವನ್ನಪ್ಪಿತು.

ಸ ಖಡ್ಗವರಮಾದಾಯ ಪ್ರಸಸಾರ ರಣೇ ಕಪಿಮ್ ।

ಆಚ್ಛಿದ್ಯ ಖಡ್ಗಮಸ್ಯೈವ ನಿಹತೋ ವಾಲಿಸೂನುನಾ ॥೮.೪೨॥

ಆಗ ನರಾಂತಕನು ಶ್ರೇಷ್ಠವಾದ ಕತ್ತಿಯನ್ನು ತೆಗೆದುಕೊಂಡು, ಯುದ್ಧದಲ್ಲಿ ಅಂಗದನನ್ನು ಹೊಂದಿದನು. ಆಗ ವಾಲೀಪುತ್ರನಾದ ಅಂಗದನು  ಅವನ ಕತ್ತಿಯನ್ನೇ ಸೆಳೆದು ನರಾಂತಕನನ್ನು ಕೊಂದನು.

ಕನ್ನಡ ಪದ್ಯರೂಪ  : https://go-kula.blogspot.com/2018/06/8-35-42.html