Mahabharata Tatparya Nirnaya Kannada 17243_17248

 

ಹರೌ ತು ಪುಷ್ಕರಂ ಗತೇ ಮುನೀಶ್ವರೈಃ ಸಮರ್ಚ್ಚಿತೇ ।

ಸಮೀಯತುಶ್ಚ ತಾವುಭಾವಥಾತ್ರ ಹಂಸಡೀಭಕೌ ॥೧೭.೨೪೩॥

 

ಮುನಿಗಳಿಂದ ಕೂಡಿದ ಶ್ರೀಕೃಷ್ಣನು ಅರ್ಚಿತನಾಗಿ ಪುಷ್ಕರಕ್ಕೆ ಬರಲು, ಅಲ್ಲಿಗೆ ಹಂಸ-ಡಿಭಕರೂ ಕೂಡಾ ಬಂದರು.

[ಇಲ್ಲಿ ನಾವು ಡೀಭಕ ಎನ್ನುವ ನಾಮ ಪ್ರಯೋಗವನ್ನು ಕಾಣುತ್ತೇವೆ. ಯಾವರೀತಿ ‘ಹನುಮಾನ್’ ಹಾಗು ‘ಹನೂಮಾನ್’ ಎರಡೂ ಆಂಜನೇಯನನ್ನೇ ಹೇಳುತ್ತವೋ, ಹಾಗೇ ಈ ಪ್ರಯೋಗವೂ ಕೂಡಾ. ಇದು ನಾಮ ವಿಭ್ರಾಂತವಷ್ಟೇ‘. ಅಥ ತಂ ಹಂಸಡಿಭಯೋರ್ಶಯಾಮಾಸ ಸಾತ್ಯಕಿಮ್’   ಎನ್ನುವ ಹರಿವಂಶದ ವಾಕ್ಯದಿಂದ ಇಲ್ಲಿ ಹೇಳಿರುವುದು ಡಿಭಕನ ಕುರಿತಾಗಿಯೇ ಎನ್ನುವುದು ಸ್ಪಷ್ಟವಾಗುತ್ತದೆ].  

 

ಸ ಬ್ರಹ್ಮದತ್ತನಾಮಕೋsತ್ರ ತತ್ಪಿತಾsಪ್ಯುಪಾಯಯೌ ।

ಸಮಾಗತೌ ಚ ಭೂತಕೌ ಶಿವಸ್ಯ ಯೌ ಪುರಸ್ಸರೌ ॥೧೭.೨೪೪॥

 

ಆ ಪುಷ್ಕರಕ್ಕೆ ಹಂಸ-ಡಿಭಕರ ತಂದೆಯಾದ ಬ್ರಹ್ಮದತ್ತನೂ(ಸಾಲ್ವನೂ)   ಕೂಡಾ ಬಂದನು. ಶಿವನ ಎರಡು ಭೂತಗಳೂ(ಮಹೋದರ ಮತ್ತು ಕುಣ್ಡಧಾರಿ) ಕೂಡಾ ಪುಷ್ಕರಕ್ಕೆ ಬಂದವು.  

 

ವಿಚಕ್ರನಾಮಕೋsಸುರಃ ಪುರಾ ವಿರಿಞ್ಚತೋ ವರಮ್ ।

ಅವದ್ಧ್ಯತಾಮಜೇಯತಾಮವಾಪ್ಯ ಬಾಧತೇ ಸುರಾನ್ ॥೧೭.೨೪೫॥

 

ಸ ಚಾಭವತ್ ತಯೋಃ ಸಖಾ ಸಹಾಯಕಾಮ್ಯಯಾssಗಮತ್ ।

ಹಿಡಿಮ್ಬರಾಕ್ಷಸೋsಪಿ ಯಃ ಪುರಾssಪ ಶಙ್ಕರಾದ್ ವರಮ್ ॥೧೭.೨೪೬॥

 

ನ ಜೀಯಸೇ ನ ವದ್ಧ್ಯಸೇ ಕುತಶ್ಚನೇತಿ ತೋಷಿತಾತ್ ।

ಸ ಚೈತಯೋಃ ಸಖಾsಭವತ್ ಸಮಾಜಗಾಮ ತತ್ರ ಚ ॥೧೭.೨೪೭॥

 

ಬ್ರಹ್ಮನಿಂದ ಅವಧ್ಯತ್ವವನ್ನೂ, ಅಜೇಯತ್ವವನ್ನೂ ಪಡೆದ ‘ವಿಚಕ್ರ’ ಎಂಬ ಅಸುರನೊಬ್ಬ, ದೇವತೆಗಳನ್ನು ಪೀಡಿಸುತ್ತಿದ್ದ. 

ಅವನಾದರೋ, ತನ್ನ ಗೆಳೆಯರಿಬ್ಬರಿಗೆ(ಹಂಸ-ಡಿಭಕರಿಗೆ) ಸಹಾಯ ಮಾಡಬೇಕೆಂಬ ಬಯಕೆಯಿಂದ ಅಲ್ಲಿಗೆ ಬಂದ. ಹಿಡಿಮ್ಬನೂ ಕೂಡಾ ಬಂದ. ಈ ಹಿಡಿಮ್ಬ ಹಿಂದೆಯೇ ‘ಯಾರಿಂದಲೂ  ನೀನು ಸೋಲುವುದಿಲ್ಲ ಮತ್ತು  ಕೊಲ್ಲಲ್ಪಡುವುದಿಲ್ಲ’ ಎಂದು ಸಂತುಷ್ಟನಾದ ಶಂಕರನಿಂದ ವರವನ್ನು ಪಡೆದಿದ್ದ. ಅವನೂ ಕೂಡಾ ಇವರಿಬ್ಬರ ಗೆಳೆಯನಾಗಿದ್ದುದರಿಂದ ಪುಷ್ಕರಕ್ಕೆ ಬಂದ.

 

ಅಕ್ಷೋಹಿಣೀದಶಾತ್ಮಕಂ ಬಲಂ ತಯೋರ್ಬಭೂವ ಹ ।

ವಿಚಕ್ರಗಂ ಷಡಾತ್ಮಕಂ ತಥೈಕಮೇವ ರಾಕ್ಷಸಮ್ ॥೧೭.೨೪೮॥

 

ಹಂಸ-ಡಿಭಕರ   ಹತ್ತು ಅಕ್ಷೋಹಿಣೀಯಾತ್ಮಕವಾಗಿರುವ ಸೈನ್ಯವೂ ಅಲ್ಲಿಗೆ ಬಂದಿತು. ಜೊತೆಗೆ ವಿಚಕ್ರನ  ಆರು ಅಕ್ಷೋಹಿಣಿ ಮತ್ತು ಹಿಡಿಮ್ಬನ ಒಂದು ಅಕ್ಷೋಹಿಣಿ ಸೇನೆ ಕೂಡಾ ಬಂತು.