Mahabharata Tatparya Nirnaya Kannada 17280_17288

 

ವಿಧೂಯ ಸೈನಿಕಾಂಶ್ಚ ಸಃ ಪ್ರಗೃಹ್ಯ ಚಾಪಮಾತತಮ್ ।

ಹರಿಂ ಜಗಾಮ ಚೋನ್ನದನ್ ಮಹಾಸ್ತ್ರಶಸ್ತ್ರವರ್ಷಣಃ ॥೧೭.೨೮೦॥

 

ಯಾದವರ ಸಮಸ್ತ ಸೈನಿಕರನ್ನೂ ಓಡಿಸಿದ ಡಿಭಕನು, ತದನಂತರ ತನ್ನ ಬಿಲ್ಲನ್ನು ಹಿಡಿದು, ಗಟ್ಟಿಯಾಗಿ ಕಿರುಚುತ್ತಾ, ಮಹಾಸ್ತ್ರ-ಶಸ್ತ್ರಗಳೊಂದಿಗೆ ಶ್ರೀಕೃಷ್ಣನನ್ನು ಎದುರುಗೊಂಡನು.

 

ಹರಿವಮ್ಶದಲ್ಲಿ(ಭವಿಷ್ಯತ್ ಪರ್ವಣಿ ೧೨೭.೧೪) ಈ ಕುರಿತಾಗಿ ವಿವರಿಸಿರುವುದನ್ನು ಕಾಣಬಹುದು: ಭೀತಾಶ್ಚ ಯಾದವಾ ರಾಜನ್ ಪಲಾಯನಪರಾಯಣಾಃ’.

 

ತಮಾಶು ಕೇಶವೋsರಿಹಾ ಸಮಸ್ತಸಾಧನೋಜ್ಝಿತಮ್ ।

ಕ್ಷಣಾಚ್ಚಕಾರ ಸೋsಪ್ಯಗಾದ್ ವಿಸೃಜ್ಯ ತಂ ಹಲಾಯುಧಮ್ ॥೧೭.೨೮೧॥

 

ಶತ್ರುಸಂಹಾರಕನಾದ ಶ್ರೀಕೃಷ್ಣನು ಕ್ಷಣದಲ್ಲೇ ಡಿಭಕನನ್ನು ಎಲ್ಲಾ ಯುದ್ಧ ಸಾಧನರಹಿತನನ್ನಾಗಿ ಮಾಡಿದನು.  ಆಗ ಡಿಭಕನು ಶ್ರೀಕೃಷ್ಣನನ್ನು ಬಿಟ್ಟು ಹಲಾಯುಧನನ್ನು ಕುರಿತು ತೆರಳಿದನು. 

 

ಹಲಾಯುಧೋ ನಿರಾಯುಧಂ ವಿಧಾಯ ಹಂಸಮೋಜಸಾ ।

ವಿಕೃಷ್ಟಚಾಪ ಆಗತಂ ದದರ್ಶ ತಸ್ಯ ಚಾನುಜಮ್ ॥೧೭.೨೮೨॥

 

ಹಲಾಯುಧನು ತನ್ನ ಶಕ್ತಿಯಿಂದ ಹಂಸನನ್ನು ನಿರಾಯುಧನನ್ನಾಗಿ ಮಾಡುತ್ತಿದ್ದಾಗಲೇ ಹಂಸನ ತಮ್ಮ ಡಿಭಕನೂ ಕೂಡಾ ಅವನಲ್ಲಿಗೆ ಬಂದ.

 

ಸ ಹಂಸ ಆಶು ಕಾರ್ಮ್ಮುಕಂ ಪುನಃ ಪ್ರಗೃಹ್ಯ ತಂ ಬಲಮ್ ।

ಯದಾssಸಸಾದ ಕೇಶವೋ ನ್ಯವಾರಯತ್ ತಮೋಜಸಾ ॥೧೭.೨೮೩॥

 

ಹಂಸನು ಮತ್ತೆ ಬಿಲ್ಲನ್ನು ಹಿಡಿದು, ಬಲರಾಮನನ್ನು ಕುರಿತು ಯಾವಾಗ ಬಂದನೋ, ಆಗ ಕೇಶವನು ಅವನನ್ನು ತಡೆದನು.

 

ಶಿನೇಃ ಸುತಾತ್ಮಜೋsಪ್ಯಸೌ ವಿಹಾಯ ಹಂಸಕಾನುಜಮ್ ।

ರಥಾನ್ತರಂ ಸಮಾಸ್ಥಿತೋ ಜಗಾಮ ತಾತಮಸ್ಯ ಚ ॥೧೭.೨೮೪ ॥

 

ಅದೇ ಸಂದರ್ಭದಲ್ಲಿ, ಹಿಂದೆ ಡಿಭಕನಿಂದ ರಥಹೀನನಾಗಿ ಡಿಭಕನನ್ನು ಬಿಟ್ಟುಹೋಗಿದ್ದ  ಸಾತ್ಯಕಿಯು,  ಇನ್ನೊಂದು ರಥವನ್ನೇರಿ ಬಂದು ಬ್ರಹ್ಮದತ್ತನನ್ನು ಎದುರುಗೊಂಡ.

 

ವಯೋಗತಃ ಪಿತಾ ತಯೋರ್ಯುಯೋಧ ತೇನ ವೃಷ್ಣಿನಾ ।

ಶರಂ ಚ ಕಣ್ಠಕೂಬರೇ ವ್ಯಸರ್ಜ್ಜಯತ್ ಸ ಸಾತ್ಯಕೇಃ ॥೧೭.೨೮೫ ॥

 

ವೃದ್ಧನಾದ ಹಂಸ-ಡಿಭಕರ ತಂದೆಯಾದ ಬ್ರಹ್ಮದತ್ತನು ಸಾತ್ಯಕಿಯ ಜೊತೆಗೆ ಯುದ್ಧಮಾಡಿದನು ಮತ್ತು ಸಾತ್ಯಕಿಯ  ಕೊರಳಿನಹತ್ತಿರ ಬಲವಾಗಿ ಬಾಣಬಿಟ್ಟನು.  

 

ಸ ಸಾತ್ಯಕಿರ್ದ್ದೃಢಾಹತೋ ಜಗಾಮ ಮೋಹಮಾಶು ಚ ।

ಸುಲಬ್ದಸಞ್ಜ್ಞ ಉತ್ಥಿತಃ ಸಮಾದದೇsರ್ದ್ಧಚನ್ದ್ರಕಮ್ ॥೧೭.೨೮೬॥

 

ಗಟ್ಟಿಯಾಗಿ ಪೆಟ್ಟುತಿಂದ ಸಾತ್ಯಕಿಯು ಕೂಡಲೇ ಮೂರ್ಛೆಯನ್ನು ಹೊಂದಿದ. ಸ್ವಲ್ಪಹೊತ್ತಿನ ನಂತರ ಎಚ್ಚೆತ್ತ ಅವನು ಅರ್ಧಚಂದ್ರದ ಬಾಣವನ್ನು ತೆಗೆದುಕೊಂಡ.

 

ಸ ತೇನ ತಚ್ಛಿರೋ ಬಲೀ ಚಕರ್ತ್ತ ಶುಕ್ಲಮೂರ್ದ್ಧಜಮ್ ।

ಯದಮ್ಬಯಾSಭಿಕಾಮಿತಂ ಪುರಾ ಪಪಾತ ತತ್  ಕ್ಷಿತೌ ॥೧೭.೨೮೭॥

 

ಸಾತ್ಯಕಿಯು ಆ ಬಾಣದಿಂದ ಬಲಿಷ್ಠನಾದ, ಬಿಳಿಕೂದಲುಳ್ಳ ಬ್ರಹ್ಮದತ್ತನ(ಸಾಲ್ವನ) ತಲೆಯನ್ನು ಕತ್ತರಿಸಿದನು. ಯಾವ ತಲೆ ಹಿಂದೆ ಅಂಬೆಯಿಂದ ಪ್ರೀತಿಸಲ್ಪಟ್ಟಿತ್ತೋ, ಅದು ಇಂದು ಕತ್ತರಿಸಲ್ಪಟ್ಟು ಭೂಮಿಯಲ್ಲಿ ಬಿತ್ತು. 

 

ನದಂಶ್ಚ ಸಾತ್ಯಕಿರ್ಹರೇರ್ಜ್ಜಗಾಮ ಪಾರ್ಶ್ವಮುದ್ಧತಃ ।

ಬಲೋsಪಿ ಹಂಸಕಾನುಜಂ ಯುಯೋಧ ಸೇನಯಾ ಯುತಮ್ ॥೧೭.೨೮೮॥

 

ಸಾತ್ಯಕಿಯು ಗಟ್ಟಿಯಾಗಿ ಸಿಂಹನಾದ ಮಾಡುತ್ತಾ, ವಿಜಯದಿಂದ ಬೀಗುತ್ತಾ, ಪರಮಾತ್ಮನ ಸಮೀಪಕ್ಕೆ ತೆರಳಿದನು. ಬಲರಾಮನೂ ಕೂಡಾ ಸೇನೆಯಿಂದ ಕೂಡಿರುವ ಡಿಭಕನನ್ನು ಕುರಿತು ಯುದ್ಧಮಾಡಿದನು.