Mahabharata Tatparya Nirnaya Kannada 17257_17265

 

ಸಮಸ್ತಯಾದವಾನ್ ರಣೇ ವಿಧೂಯ ತೌ ಜನಾರ್ದ್ದನಮ್ ।

ಉಪೇತ್ಯ ಚಾಂಸಗೌ ಹರೇರದಂಶತಾಂ ಸುಕರ್ಣ್ಣಕೌ ॥೧೭.೨೫೭॥

 

ಆ ಎರಡು ಭೂತಗಳು ಯುದ್ಧದಲ್ಲಿ ಎಲ್ಲಾ ಯಾದವರನ್ನೂ ಆಚೆ ಜಾಡಿಸಿ, ಪರಮಾತ್ಮನನ್ನು ಹೊಂದಿ, ಪರಮಾತ್ಮನ ಹೆಗಲಮೇಲೆ ಕುಳಿತುಕೊಂಡು ಪರಮಾತ್ಮನ ಸುಂದರವಾದ ಕಿವಿಗಳನ್ನು ಕಚ್ಚಿದವು.

 

ಸ ತೌ ಭುಜಪ್ರವೇಗತೋ ವಿಧೂಯ ಶಙ್ಕರಾಲಯೇ ।

ನ್ಯಪಾತಯದ್ ಬಲಾರ್ಣ್ಣವೋsಮಿತಸ್ಯ ಕಿಂ ತದುಚ್ಯತೇ ॥೧೭.೨೫೮॥

 

ಕೃಷ್ಣನಾದರೋ, ತನ್ನ  ಭುಜವನ್ನು ವೇಗವಾಗಿ ಜಾಡಿಸಿ, ಆ ಭೂತಗಳನ್ನು ಕೈಲಾಸದಲ್ಲಿ ಬೀಳಿಸಿದನು. ಬಲಗಳಿಗೆ ಕಡಲಿನಂತಿರುವ, ಎಣಿಯಿರದ ಬಲದವನಿಗೆ ಇದನ್ನೇನು ಅಚ್ಚರಿ ಎಂದು ಹೇಳುವುದು?    (ಭಗವಂತನ ವಿಷಯದಲ್ಲಿ ಇದೇನೂ ದೊಡ್ಡ ವಿಷಯವಲ್ಲ)

 

ಪ್ರಭಕ್ಷಯನ್ತಮೋಜಸಾ ಹಿಡಿಮ್ಬಮುದ್ಧತಂ ಬಲಮ್ ।

ಸಹೋಗ್ರಸೇನಕೋ ಯಯೌ ಪಿತಾ ಹರೇಃ ಶರಾನ್ ಕ್ಷಿಪನ್ ॥೧೭.೨೫೯॥

 

ತದನಂತರ, ಯಾದವ ಸೈನ್ಯವನ್ನು ಬಹಳ ವೇಗದಿಂದ ತಿನ್ನುತ್ತಿರುವ ದುರಾಹಂಕಾರಿ ಹಿಡಿಮ್ಬನನ್ನು, ಉಗ್ರಸೇನನಿಂದ ಕೂಡಿರುವ ಶ್ರೀಕೃಷ್ಣನ ತಂದೆಯಾದ ವಸುದೇವನು, ಬಾಣಗಳನ್ನು ಬಿಡುತ್ತಾ ಎದುರುಗೊಂಡನು. 

 

ತಯೋ ರಥೌ ಸಹಾಯುಧೌ ಪ್ರಭಕ್ಷ್ಯ ರಾಕ್ಷಸೋ ಬಲೀ ।

ಪ್ರಗೃಹ್ಯ ತಾವಭಾಷತ ಪ್ರಯಾತಮಾಶು ಮೇ ಮುಖಮ್ ॥೧೭.೨೬೦॥

 

ಅವರಿಬ್ಬರ(ಉಗ್ರಸೇನ ಹಾಗು ವಸುದೇವರ) ಆಯುಧಗಳಿಂದ ಕೂಡಿರುವ ರಥಗಳನ್ನು, ಬಲಿಷ್ಠನಾಗಿರುವ ಆ ರಾಕ್ಷಸನು ತಿಂದು, ಅವರಿಬ್ಬರನ್ನೂ ಹಿಡಿದು, ‘ಬನ್ನಿ ನನ್ನ ಮುಖಕ್ಕೆ’ ಎಂದು ಹೇಳಿದನು.

 

ತದಾ ಗದಾವರಾಯುಧಃ ಸಹೈವ ಹಂಸಭೂಭೃತಾ ।

ಪ್ರಯುದ್ಧ್ಯಮಾನ ಆಯಯೌ ವಿಹಾಯ ತಂ ಹಲಾಯುಧಃ ॥೧೭.೨೬೧॥

 

ಆಗ ಹಂಸನೊಂದಿಗೆ ಯುದ್ಧಮಾಡುತ್ತಿದ್ದ ಗದೆಯನ್ನು  ಬಳಸುವ ಬಲರಾಮನು ಹಂಸನನ್ನು ಬಿಟ್ಟು, ಹಿಡಿಮ್ಬನ ಬಳಿಗೆ ಓಡಿಬಂದ.

 

ತಮಾಗತಂ ಸಮೀಕ್ಷ್ಯ ತೌ ವಿಹಾಯ ರಾಕ್ಷಸಾಧಿಪಃ ।

ಉಪೇತ್ಯ ಮುಷ್ಟಿನಾsಹನದ್ ಬಲಂ ಸ ವಕ್ಷಸಿ ಕ್ರುಧಾ ॥೧೭.೨೬೨॥

 

ಬಳಿಬಂದ ಬಲರಾಮನನ್ನು ಕಂಡ ಹಿಡಿಮ್ಬನು, ವಸುದೇವ ಮತ್ತು ಉಗ್ರಸೇನನನ್ನು ಬಿಟ್ಟು, ಸಿಟ್ಟಿನಿಂದ ಬಲರಾಮನನ್ನು  ಹೊಂದಿ, ಮುಷ್ಟಿಯಿಂದ ಅವನ ಎದೆಯಮೇಲೆ ಗಟ್ಟಿಯಾಗಿ ಹೊಡೆದನು. 

 

ಉಭೌ ಹಿ ಬಾಹುಷಾಳಿನಾವಯುದ್ಧ್ಯತಾಂ ಚ ಮುಷ್ಟಿಭಿಃ ।

ಚಿರಂ ಪ್ರಯುದ್ಧ್ಯ ತಂ ಬಲೋsಗ್ರಹೀತ್ ಸ ಜಙ್ಘಯೋರ್ವಿಭುಃ ॥೧೭.೨೬೩॥

 

ಇಬ್ಬರೂ ಕೂಡಾ ಬಲಿಷ್ಠವಾದ ಕೈಯುಳ್ಳವರು. ಅವರು ತಮ್ಮ ಕೈಗಳಿಂದಲೇ ಮುಷ್ಟಿ ಯುದ್ಧ ಮಾಡಲಾರಮ್ಭಿಸಿದರು. ಬಹಳ ಕಾಲ ಯುದ್ಧಮಾಡಿದ ಮೇಲೆ ಹಿಡಿಮ್ಬನನ್ನು ಶ್ರೇಷ್ಠನಾಗಿರುವ ಬಲರಾಮನು ತನ್ನ ತೊಡೆಗಳಲ್ಲಿ ಹಿಡಿದುಕೊಂಡನು. 

 

ಅಥೈನಮುದ್ಧೃತಂ ಬಲಾದ್ ಬಲಃ ಸ ದೂರಮಾಕ್ಷಿಪತ್ ।

ಪಪಾತ ಪಾದಯೋಜನೇ ಸ ನಾsಜಗಾಮ ತಂ ಪುನಃ ॥೧೭.೨೬೪॥

 

ವಿಹಾಯ ಸೈನಿಕಾಂಶ್ಚ ತೌ ನೃಪೌ ಯಯೌ ವನಾಯ ಸಃ ।

ನಿಹತ್ಯ ತಸ್ಯ ರಾಕ್ಷಸಾನ್ ಹಲಾಯುಧೋ ನನಾದ ಹ ॥೧೭.೨೬೫ ॥

 

ತದನಂತರ ಹಿಡಿಮ್ಬನನ್ನು ಮೇಲೆತ್ತಿದ ಬಲರಾಮನು ಅವನನ್ನು ಪಾದ-ಯೋಜನ ದೂರಕ್ಕೆ ಎಸೆದನು.  ದೂರದಲ್ಲಿ ಬಿದ್ದ ಹಿಡಿಮ್ಬನು ಮತ್ತೆ ಬಲರಾಮನನ್ನು ಕುರಿತು ಬರಲೇ ಇಲ್ಲ.

ಹಿಡಿಮ್ಬ ತನ್ನ ಸೈನಿಕರನ್ನು, ಹಂಸ-ಡಿಭಕರನ್ನೂ ಕೂಡಾ ಬಿಟ್ಟು ಕಾಡಿಗೆ ಓಡಿಹೋದ. ಬಲರಾಮನು ಅವನ ಸೈನಿಕರಾಗಿರುವ ರಾಕ್ಷಸರನ್ನು ಕೊಂದು ಘರ್ಜಿಸಿದ.

[ಈ ಹಿಡಿಮ್ಬನನ್ನೇ  ಮುಂದೆ   ಭೀಮಸೇನ ಕೊಲ್ಲುವುದು]