Mahabharata Tatparya Nirnaya Kannada 28-79-87

 

ಕೃಷ್ಣಂ ದ್ಯೂತೇ ನಿಧೇಹೀತಿ ಯದಾವಾದೀತ್ ಸುಯೋಧನಃ ।

ತತ್ಪ್ರತಿಜ್ಞಾನುಸಾರೇಣ ಭೀಮೋ ಮೂರ್ದ್ಧಾನಮಕ್ರಮೀತ್ ।

‘ಋಷಭಂ ಮಾ ಸಮಾನಾನಾಮ್’ ಇತಿ ಸೂಕ್ತಂ ದದರ್ಶ ಚ ॥೨೮.೭೯॥

 

‘ಕೃಷ್ಣನನ್ನು ಜೂಜಿನಲ್ಲಿ ಪಣಕ್ಕೆ ಇಡು’ ಎಂದು ಯಾವ ಕಾರಣದಿಂದ ಯುಧಿಷ್ಠಿರನಿಗೆ ಸುಯೋಧನ ಹೇಳಿದ್ದನೋ, ಆಗ ಭೀಮ ಏನು ಪ್ರತಿಜ್ಞೆ ಮಾಡಿದ್ದನೋ, ಆ ಪ್ರತಿಜ್ಞೆಗೆ ಅನುಗುಣವಾಗಿ ಭೀಮಸೇನನು ದುರ್ಯೋಧನನ ತಲೆಗೆ ಒದ್ದ. ಹಾಗೆ ಒದೆಯುತ್ತ ಭೀಮಸೇನ ‘ಋಷಭಂ ಮಾ ಸಮಾನಾನಾಮ್’ ಎನ್ನುವ ಸೂಕ್ತವನ್ನು ಕಂಡ.

[ಇದನ್ನು ಮಹಾಭಾರತದಲ್ಲಿ  ‘ಶಿರಶ್ಚ ರಾಜಸಿಂಹಸ್ಯ ಪಾದೇನ ಸಮಲೋಡಯತ್’ (ಶಲ್ಯಪರ್ವ ೬೦.೦೫)  ಎಂದು ಹೇಳಿರುವುದನ್ನು ಕಾಣಬಹುದು]

 

ತೇಷಾಂ ಪುಣ್ಯಾನಿ ವಿದ್ಯಾಶ್ಚ ಸಮಾದಾಯೈವ ಸರ್ವಶಃ ।

ತಾಂಶ್ಚಕಾರ ತಮೋಗನ್ತೄಂಸ್ತಸ್ಯ ಮೂರ್ಧ್ನಿ ಪದಾSSಕ್ರಮನ್ ॥೨೮.೮೦॥

 

ಹೀಗೆ ಭೀಮಸೇನ ದುರ್ಯೋಧನಾದಿಗಳ ಪುಣ್ಯಗಳನ್ನೂ, ವಿದ್ಯೆಯನ್ನೂ, ಎಲ್ಲೆಡೆಯಿಂದ ತೆಗೆದುಕೊಂಡು ಅವರನ್ನು ತಮಸ್ಸಿಗೆ ಹೋಗುವಂತೆ ಮಾಡಿದ. (ದುರ್ಯೋಧನನ ತಲೆಯ ಮೇಲೆ ಮತ್ತೆಮತ್ತೆ ಒದೆಯುತ್ತಾ, ದುರ್ಯೋಧನಾದಿಗಳನ್ನು ತಮಸ್ಸಿಗೆ ಹೋಗುವಂತೆ ಮಾಡಿದ).

 

ಸ್ಮಾರಯಾಮಾಸ ಕರ್ಮ್ಮಾಣಿ ಯಾನಿ ತಸ್ಯ ಕೃತಾನಿ ಚ ।

ಕೃಷ್ಣಬನ್ಧೇ ಕೃತೋ ಮನ್ತ್ರ ಇತಿ ಮೂರ್ಧ್ನಿ ಪದಾSಹನತ್ ॥೨೮.೮೧॥

 

ದುರ್ಯೋಧನನು ಹಿಂದೆ ಏನು ಕರ್ಮಗಳನ್ನು ಮಾಡಿದ್ದನೋ, ಅದೆಲ್ಲವನ್ನೂ ಭೀಮ ಅವನಿಗೆ ನೆನಪಿಸಿದ.  ಶ್ರೀಕೃಷ್ಣನನ್ನು ಕಟ್ಟಿಹಾಕಬೇಕು ಎಂದು ಮಂತ್ರಾಲೋಚನೆ ಮಾಡಿರುವುದನ್ನು ನೆನಪಿಸಿ ಮತ್ತೆಮತ್ತೆ ಒದ್ದ.

 

ಪುನಃಪುನಶ್ಚ ತದ್ ವೀಕ್ಷ್ಯ ಚುಕ್ರೋಧ ಮುಸಲಾಯುಧಃ ।

ಚುಕ್ರೋಶ ನೈವ ಧರ್ಮ್ಮೋSಯಮಿತ್ಯಸಾವೂರ್ಧ್ವಬಾಹುಕಃ ॥೨೮.೮೨॥

 

ಭೀಮ ಪುನಃಪುನಃ ದುರ್ಯೋಧನನ ತಲೆಯನ್ನು ಒದೆಯುತ್ತಿರುವುದನ್ನು ನೋಡಿ ಬಲರಾಮ ಸಿಟ್ಟುಗೊಂಡ. ‘ಇದು ಧರ್ಮವಲ್ಲ’ ಎಂದು ತನ್ನ ಕೈಗಳನ್ನು ಮೇಲೆತ್ತಿ ಗಟ್ಟಿಯಾಗಿ ಕಿರುಚಿದ.

 

ಪುನಃ ಕ್ರೋಧಾಭಿತಾಮ್ರಾಕ್ಷ ಆದಾಯ ಮುಸಲಂ ಹಲಮ್ ।

ಅಭಿದುದ್ರಾವ ಭೀಮಂ ತಂ ನ ಚಚಾಲ ವೃಕೋದರಃ ॥೨೮.೮೩॥

 

ಮತ್ತೆ ಕೋಪದಿಂದ ಕೆಂಪಡರಿದ ಕಣ್ಣುಗಳುಳ್ಳವನಾಗಿ, ಮುಸಲಾಯುಧವನ್ನು ಮತ್ತು ಹಲಾಯುಧವನ್ನು ತೆಗೆದುಕೊಂಡು ಬಲರಾಮ ಭೀಮನನ್ನು ಹೊಡೆಯಲೆಂದು ಹೋದ. ಆದರೆ  ಭೀಮಸೇನ ಸ್ವಲ್ಪವೂ ಕದಲಲಿಲ್ಲ.    

 

ಅಭಯೇ ಸಂಸ್ಥಿತೇ ಭೀಮೇ ರಾಮಂ ಜಗ್ರಾಹ ಕೇಶವಃ  ।

ಆಹ ಧರ್ಮ್ಮೇಣ ನಿಹತೋ ಭೀಮೇನಾಯಂ ಸುಯೋಧನಃ ॥೨೮.೮೪॥

 

ಹೀಗೆ ಭೀಮಸೇನ  ಯಾವುದೇ ಭಯವಿಲ್ಲದೇ ನಿಂತಿರಲು, ಕೃಷ್ಣನು ಬಲರಾಮನನ್ನು ಹಿಡಿದುಕೊಂಡ ಮತ್ತು ಹೇಳಿದ ಕೂಡಾ- ‘ಈ ದುರ್ಯೋಧನನು ಭೀಮಸೇನನಿಂದ ಧರ್ಮದಿಂದಲೇ ಕೊಲ್ಲಲ್ಪಟ್ಟಿದ್ದಾನೆ’ ಎಂದು.

 

ನ ಮಣ್ಡಲೇSಭಿಸಾರೇ ವಾ ನಾಪಸಾರೇ ಚ ನಾಭಿತಃ ।

ಅಧೋ ಹನ್ಯಾದ್ ವಞ್ಚಯನ್ತಮಧೋ ಹತ್ವಾ ನ ದುಷ್ಯತಿ ॥೨೮.೮೫॥

 

‘ಮಂಡಲದಲ್ಲಿ, ಮುಂಗಟ್ಟಿನಲ್ಲಿ, ಹಿಂಗಟ್ಟಿನ ಯುದ್ಧದಲ್ಲಿ ಹೊಕ್ಕುಳಿನ ಕೆಳಗೆ ಹೊಡೆಯಬಾರದು ಎನ್ನುವುದು ನಿಯಮ. ಆದರೆ ಇಲ್ಲಿ ದುರ್ಯೋಧನ ತಲೆಕೆಳಗೆ ಮಾಡಿ ಮೋಸಮಾಡಿದ್ದಾನೆ. ಹೀಗೆ ಮೋಸಮಾಡುತ್ತಿರುವ ಅವನಿಗೆ ಕೆಳಗೆ ಹೊಡೆದರೆ ಯಾವುದೇ ದೋಷವಿಲ್ಲ.   

 

ಕೃತಾ ಪ್ರತಿಜ್ಞಾ ಚ ವೃಕೋದರೇಣ ಭೇತ್ಸ್ಯೇ ತವೋರೂ ಇತಿ ಯುಕ್ತಿಪೂರ್ವಮ್ ।

ಸಂಶ್ರಾವಯಾನೇನ ತದೇಷ ಧರ್ಮ್ಮತೋ ಜಘಾನ ದುರ್ಯ್ಯೋಧನಮಗ್ರ್ಯಕರ್ಮ್ಮಾ ॥೨೮.೮೬॥

 

ಭೀಮಸೇನನಿಂದ ಪ್ರತಿಜ್ಞೆಯು ಮಾಡಲ್ಪಟ್ಟಿತ್ತು. ಭೀಮ ‘ನಿನ್ನ ತೊಡೆಯನ್ನು ಮುರಿಯುತ್ತೇನೆ’ ಎಂದು ಯುಕ್ತಿಪೂರ್ವಕವಾಗಿಯೇ ಹೇಳಿದ್ದಾನೆ. ಅದರಿಂದ ಇವನು ಶ್ರೇಷ್ಠವಾದ ಕರ್ಮವುಳ್ಳವನಾಗಿ ದುರ್ಯೋಧನನನ್ನು ಶುದ್ಧಧರ್ಮದಿಂದಲೇ ಕೊಂದುಹಾಕಿದ’.

 

ವಾಸುದೇವವಚಃ ಶ್ರುತ್ವಾ ಧರ್ಮ್ಮಚ್ಛಲಮಿತಿ ಬ್ರುವನ್ ।

ರೌಹಿಣೇಯೋ ಜಗಾಮಾSಶು ಸ್ವಪುರೀಮೇವ ಸಾನುಗಃ ॥೨೮.೮೭॥

 

ವಾಸುದೇವನ ಮಾತನ್ನು ಕೇಳಿದ ಮೇಲೂ, ‘ಇದು ಧರ್ಮವಲ್ಲ’ ಎಂದು ಹೇಳುತ್ತಾ, ಬಲರಾಮನು ತನ್ನ ಹಿಂಬಾಲಕರಿಂದ ಕೂಡಿಕೊಂಡು ದ್ವಾರಕಾಪಟ್ಟಣಕ್ಕೆ ತೆರಳಿದ.