Mahabharata Tatparya Nirnaya Kannada 29-06-12

ಅಸಾನ್ತ್ವಯಚ್ಚ ಬಾನ್ಧವಾನ್ ಸ ಪೌರಸಂಶ್ರಿತಾದಿಕಾನ್ ।

ದದೌ ಯಥೇಷ್ಟತೋ ಧನಂ ರರಕ್ಷ ಚಾನು ಪುತ್ರವತ್ ॥ ೨೯.೦೬ ॥

 

ಧರ್ಮರಾಜನು ತನ್ನ ಪ್ರಜೆಗಳನ್ನು, ತನ್ನನ್ನು ಆಶ್ರಯಿಸಿದವರನ್ನು, ಬಂಧುಗಳನ್ನೂ ಸಮಾಧಾನಗೊಳಿಸಿದ. ಅವರಿಗೆ ಅಗತ್ಯವಿದ್ದ ಹಣವನ್ನು ಕೊಟ್ಟ ಮತ್ತು ಅವರನ್ನು ಮಕ್ಕಳಂತೆ ರಕ್ಷಿಸಿದ ಕೂಡಾ.  

 

ಸ ಭೀಷ್ಮದ್ರೋಣಕರ್ಣ್ಣಾನಾಂ ವಧಾದ್ ದುರ್ಯ್ಯೋಧನಸ್ಯ ಚ ।

ಪಾಪಾಶಙ್ಕೀ ತಪ್ಯಮಾನೋ ರಾಜ್ಯತ್ಯಾಗೇ ಮನೋ ದಧೇ ॥ ೨೯.೦೭ ॥

 

ಆ ಧರ್ಮರಾಜನು ಭೀಷ್ಮ, ದ್ರೋಣ, ಕರ್ಣರ ಸಂಹಾರದಿಂದಲೂ, ದುರ್ಯೋಧನನ ಸಂಹಾರದಿಂದಲೂ  ತನಗೆ  ಪಾಪ ಬಂದಿರುವುದೋ ಏನೋ ಎಂದು ಶಂಕಿಸುವವನಾಗಿ, ಸಂಕಟಪಡುತ್ತಾ, ರಾಜ್ಯವನ್ನು ಬಿಡುತ್ತೇನೆ ಎಂದು ಮನಸ್ಸಿನಲ್ಲಿ ನಿರ್ಧಾರಮಾಡಿದನು.

 

ಸೋSನುಜೈಃ ಕೃಷ್ಣಯಾ ವಿಪ್ರೈರಪ್ಯುಕ್ತೋ ಧರ್ಮ್ಮಶಾಸನಮ್ ।

ಭೀಮಂ ಸಮ್ಪ್ರಾರ್ತ್ಥಯಿತ್ವೈವ ನ ವೇತ್ಥ್ಸಿತ್ಯಾಹ ಫಲ್ಗುನಮ್ ॥ ೨೯.೦೮ ॥

 

ತಮ್ಮಂದಿರಿಂದಲೂ, ದ್ರೌಪದೀದೇವಿಯಿಂದಲೂ, ಬ್ರಾಹ್ಮಣರಿಂದಲೂ ಕೂಡಾ ಧರ್ಮಾನುಶಾಸನದ ಬಗ್ಗೆ ಹೇಳಿಸಿಕೊಳ್ಳಲ್ಪಟ್ಟವನಾಗಿ, ಭೀಮಸೇನನಲ್ಲಿ ಬೇಡಿಕೊಂಡು(ಇನ್ನೂ ಹೆಚ್ಚಿನ ಧರ್ಮಶಿಕ್ಷಣ ಮಾಡಬೇಡ ಎಂದು ಬೇಡಿಕೊಂಡು),  ಅರ್ಜುನನನ್ನು ಗದರಿಸಿದ(ಸೂಕ್ಷ್ಮಧರ್ಮವನ್ನು ನೀನು ತಿಳಿದಿಲ್ಲ ಎಂದು ಗದರಿದ).

[ನಾನು ರಾಜ್ಯವನ್ನು ಬಿಡುತ್ತೇನೆ, ಈ ರಾಜ್ಯ ಪಾಲನೆ ಮಾಡುವುದರಿಂದ ನನಗೆ ಯಾವ ಸುಖವೂ ಇಲ್ಲಾ ಎಂದು ಹೇಳಿ ಧರ್ಮರಾಜ ಪದತ್ಯಾಗಕ್ಕೆ ಮುಂದಾದಾಗ ತಮ್ಮಂದಿರು ಅವನಿಗೆ ಬುದ್ಧಿವಾದ ಹೇಳಿದರು. ಆಗ ಅವನು ಎಲ್ಲರ ಮಾತುನ್ನು ಕೇಳುತ್ತಾ, ಭೀಮನಲ್ಲಿ ಮುಂದೇನೂ ಹೇಳದಂತೆ ವಿನಂತಿಸಿದ. ಅರ್ಜುನನನ್ನು ಕುರಿತು- ‘ಯುದ್ಧಶಾಸ್ತ್ರವಿದೇವ ತ್ವಂ ನ ವೃದ್ಧಾಃ ಸೇವಿತಾಸ್ತ್ವಯಾ। ಸಮಾಸವಿಸ್ತರವಿದಾಂ ನ ತೇಷಾಂ ವೇತ್ಸಿ ನಿಶ್ಚಯಮ್’(ಶಾಂತಿಪರ್ವ ೧೯.೧೨)- ನಿನಗೆ ಯುದ್ಧಶಾಸ್ತ್ರ ತಿಳಿದಿರಬಹುದು. ಆದರೆ ನೀನೆಂದೂ ವೃದ್ಧರ ಸೇವೆ ಮಾಡಿಲ್ಲ. ಆದುದರಿಂದ ಧರ್ಮನಿಶ್ಚಯವು ನಿನಗೆ ತಿಳಿಯದು’ ಎಂದು ಗದರಿದ.]

 

ತಸ್ಮಿನ್ ಕ್ರುದ್ಧೇ ನೃಪಂ ಪ್ರಾಹುರ್ವಿಪ್ರಾಸ್ತ್ವತ್ತೋSಪಿ ತತ್ವವಿತ್ ।

ಶಕ್ರೋSರ್ಜ್ಜುನ ಇತಿ ಶ್ರುತ್ವಾSಪ್ಯೇತದ್ಧರ್ಮ್ಮೇ ಸಸಂಶಯಮ್ ॥ ೨೯.೦೯ ॥

 

ಯುಧಿಷ್ಠಿರನ ಮಾತಿನಿಂದ ಅರ್ಜುನ ಕೋಪಗೊಳ್ಳುತ್ತಿರಲು, ಬ್ರಾಹ್ಮಣರು ಧರ್ಮರಾಜನನ್ನು ಕುರಿತು- ‘ಅರ್ಜುನನು ಇಂದ್ರನಾಗಿದ್ದಾನೆ. ಅದರಿಂದ ನಿನಗಿಂತಲೂ ಕೂಡಾ ಧರ್ಮವನ್ನು ಅವನು ತಿಳಿದಿದ್ದಾನೆ’  ಎಂದರು. ಇದನ್ನು ಕೇಳಿಯೂ ಕೂಡಾ, ಧರ್ಮದ ಕುರಿತು ಯುಧಿಷ್ಠಿರ ಸಂಶಯದಲ್ಲೇ ಉಳಿದ.

 

ಮತ್ಸ್ನೇಹಾದೇವ ಸರ್ವೇSಪಿ ಧರ್ಮ್ಮೋSಯಮಿತಿ ವಾದಿನಃ ।

ಇತ್ಯೇವಂ ಶಙ್ಕಮಾನಂ ತಮೂಚತುರ್ವಿಪ್ರಯಾದವೌ ॥ ೨೯.೧೦ ॥

 

ಕೃಷ್ಣೌ ಧರ್ಮ್ಮೋSಯಮಿತ್ಯೇವ ಶಾಸ್ತ್ರಯುಕ್ತ್ಯಾ ಪುನಃಪುನಃ ।

ನಾತಿನಿಶ್ಚಿತಬುದ್ಧಿಂ ತಂ ತದಾSಪಿ ಪುರುಷೋತ್ತಮೌ  ॥ ೨೯.೧೧ ॥

 

ಹತಪಕ್ಷಗತತ್ವೇನ ತಚ್ಛಙ್ಕಾಯಾ ಅಗೋಚರಃ ।

ಯತೋ ಭೀಷ್ಮಸ್ತತೋ ಯಾಹಿ ತಮಿತ್ಯೂಚತುರವ್ಯಯೌ ॥ ೨೯.೧೨ ॥

 

ತನ್ನ ಮೇಲಿನ ಪ್ರೀತಿಯಿಂದ ಎಲ್ಲರೂ ಈರೀತಿಯಾಗಿ ಧರ್ಮವನ್ನು ಹೇಳುತ್ತಿದ್ದಾರೆ ಎಂದು ಸಂದೇಹಪಡುತ್ತಿರುವ ಧರ್ಮರಾಜನನ್ನು ಕುರಿತು ವೇದವ್ಯಾಸರು ಮತ್ತು ಶ್ರೀಕೃಷ್ಣ ‘ಇದು ಧರ್ಮ’ ಎಂದು ಶಾಸ್ತ್ರದ ಅನೇಕ ಯುಕ್ತಿಗಳಿಂದ ಮತ್ತೆ ಮತ್ತೆ ಹೇಳಿದರೂ ಕೂಡಾ, ದೃಢನಿಶ್ಚಯಕ್ಕೆ ಬರಲಾಗದ ಧರ್ಮರಾಜನನ್ನು ಕುರಿತು ವೇದವ್ಯಾಸ-ಕೃಷ್ಣರು- ‘ಶತ್ರುವಿನ ಪಕ್ಷದಲ್ಲಿರುವ ಭೀಷ್ಮಾಚಾರ್ಯರ ಮಾತನ್ನು ನೀನು ಸಂಶಯಪಡಲಾರೆ. ನಿನ್ನ ಸಂದೇಹಕ್ಕೆ ಸಿಲುಕದ ಭೀಷ್ಮರು ಎಲ್ಲಿದ್ದಾರೋ, ಅವರನ್ನು ಕುರಿತು ಹೋಗು’ ಎಂದು ಹೇಳಿದರು.